ရေကို အလုံအလောက် သောက်ရဲ့လား
အာဟာရဂျာနယ်ရဲ့ လတ်တလော လေ့လာမှုတစ်ရပ်အရ အနည်းငယ် ရေဓာတ်ခန်းခြောက် နေရင်တောင် အမျိုးသမီးငယ်တွေဟာ နုံးတာ၊ ခေါင်းကိုက်တာနဲ့ အာရုံစူးစိုက်နိုင်ဖို့ ခက်ခဲတာတွေ ဖြစ်တတ်တယ်လို့ သိရပါတယ်။ ရေဓာတ်ခန်းခြောက်တာကြောင့် ဗိုက်ဆာတာ၊ ပင်ပန်းတာနဲ့ စိတ်တိုတာတွေလည်း ဖြစ်တတ်ပါတယ်။ ဒါကြောင့် အစာစားချင်စိတ် လျော့ကျစေဖို့ အစာမစားခင် ရေတစ်ဖန်ခွက် သောက်သင့်ပါတယ်။ အစာစားချင်စိတ် ဖြစ်ပေါ်တဲ့အခါမှာလည်း ရေတစ်ဖန်ခွက် သောက်ပေးသင့်ပါတယ်။
အိပ်ရေးဝဝ အိပ်ရဲ့လား
အိပ်ရေးပျက်တာက စိတ်ခံစားမှုအပေါ် သက်ရောက်မှုရှိပြီး အစာစားချင်တဲ့ ဆန္ဒကို တိုးစေကာ အစာကို ပိုစားဖြစ်စေပါတယ်။ ပုံမှန်ထက် အိပ်ချိန်နည်းတဲ့ သူတွေဟာ တစ်နေ့မှာ ကယ်လိုရီ ၃၀၀ ခန့် ပိုစားဖြစ်တယ်လို့ ကိုလံဘီယာ တက္ကသိုလ်ရဲ့ လေ့လာသူတွေက ဆိုပါတယ်။ အိပ်ချိန် အလုံအလောက် မရှိတာက စိတ်ဖိစီးမှု ပိုခံရတတ်ပြီး ဗိုက်ပိုဆာတတ်ကြပါတယ်။ အထူးသဖြင့် အိပ်ရေးပျက်တဲ့ သူတွေက သကြားပါတဲ့ ကာဗိုဟိုက်ဒရိတ်အစာတွေကို စားချင်စိတ် များတတ်ကြပါတယ်။ ဒီအစာတွေကို အလွန်အမင်းစားမိရင် ကိုယ်အလေးချိန် မြင့်တက်စေနိုင်ပါတယ်။
ကောင်းတဲ့အဆီကို များများစားရဲ့လား
အိုမီဂါ ၃ ဖက်တီးအက်စစ်လို ကျန်းမာရေးနဲ့ ညီညွတ်တဲ့ အဆီတွေကို စားပေးရင် စိတ်ခံစားချက်ကို ကောင်းမွန်စေတဲ့ အကျိုးကျေးဇူးကို ရရှိစေပါတယ်။ ကော်နက်တီးကပ် တက္ကသိုလ်ရဲ့ လတ်တလော လေ့လာမှုတစ်ရပ်အရ ကိုယ်ဝန်ဆောင်ချိန်မှာ အိုမီဂါ ၃ ဖက်တီးအက်စစ်ကို မှီဝဲတဲ့ အမျိုးသမီးတွေဟာ ကလေးမွေးပြီးချိန်မှာ စိတ်ဓာတ်ကျနိုင်ခြေ လျော့ကျမှု ရှိကြောင်း သိရပါတယ်။ ဒါကြောင့် အိုမီဂါ ၃ ဖက်တီးအက်စစ်ပါတဲ့ ဆယ်လ်မွန်ငါး၊ ဆာဒင်းငါးတို့ကို တစ်ပတ် နှစ်ကြိမ်စားပါ။ ဒါမှမဟုတ် သစ်ကြားသီးကို လက်တစ်ဆုပ်စာ စားပေးပါ။ ဒီလိုမစားဖြစ်ရင် ဖြည့်စွက်ဆေးမှီဝဲပါ။
ဟက်ဟက်ပက်ပက် ရယ်မောရဲ့လား
ဒီနေ့ခေတ်မှာ အလုပ်တာဝန် အများအပြား ထမ်းဆောင်ရင်း ဟက်ဟက်ပက်ပက် ရယ်မောနိုင်တဲ့ အချိန်ရှိသင့်ပါတယ်။ ရယ်မောတာက စိတ်ဖိစီးမှုကို လျော့ကျစေပြီး သွေးစီးဆင်းမှု ကောင်းမွန်စေတယ်လို့ လေ့လာမှုတွေက သက်သေပြထားပြီးသားပါ။ တကယ်တော့ ရယ်မောတာက ကယ်လိုရီတွေကိုလည်း လောင်ကျွမ်းစေနိုင်ပါတယ်။ တစ်နေ့မှာ တစ်နာရီလောက် ဟက်ဟက်ပက်ပက် ရယ်မောတာဟာ အားကစားခန်းမမှာ နာရီဝက်လောက် လေ့ကျင့်ခန်း လုပ်သလို ကယ်လိုရီတွေကို လောင်ကျွမ်းစေနိုင်ပါတယ်။
လေပွပြီး ဗိုက်ပူတာမျိုး မဖြစ်စေဘဲ ဝမ်းဗိုက် ချပ်ရပ်လိုသူတိုင်း ရှောင်သင့်၊ ဆောင်သင့်တဲ့ အစားအသောက်တွေကို ကျွမ်းကျင်သူတွေက အောက်ပါအတိုင်း အကြံပြု ရေးသားထားပါတယ်။
အကောင်းဆုံး အစားအသောက် - ဒိန်ချဉ်
ဒိန်ချဉ်ဟာ ကျွန်မတို့ အားလုံးအတွက် ကောင်းတယ်ဆိုတာ သိကြပါတယ်။ ဒါပေမဲ့ ဝမ်းဗိုက်ချပ်ရပ်စေတယ်လို့တော့ မသိကြပါဘူး။ ဒိန်ချဉ် အများစုမှာပါတဲ့ အကျိုးပြု ဘက်တီးရီးယားတွေက အစာခြေစနစ်ကို ကျန်းမာစေပါတယ်။ ဒိန်ချဉ်ဟာ လေပွတာနဲ့ ဝမ်းချုပ်တာတွေ မဖြစ်စေဘဲ ဝမ်းဗိုက်ချပ်ရပ်နေစေတဲ့ အာနိသင် ရှိပါတယ်။
အဆိုးဆုံး အစားအသောက် – ဆော်ဒါ အချိုရည်
ဗိုက်ပူမှာ စိုးရွံ့သူတွေ အနေနဲ့ ကာဗွန်ပါတဲ့ အချိုရည်တွေကို ရှောင်သင့်ပါတယ်။ ဂက်စ်ပါတဲ့ အချိုရည်တွေဟာ ဗိုက်ကို လေတွေနဲ့ ပြည့်နေစေပြီး ဗိုက်ပူကာ လေပွနေစေပါတယ်။ ဒါကြောင့် ဗိုက်ချပ်ရပ်လိုရင် ဆော်ဒါ အချိုရည်အစား ရေ ဒါမှမဟုတ် ကယ်လိုရီနည်းတဲ့ အရည် (ဥပမာ-လက်ဖက်စိမ်းလက်ဖက်ရည်) ကို သောက်သင့်ပါတယ်။ ဒီအရည်ထဲမှာ အင်တီအောက်ဆီးဒင့် များစွာ ပါဝင်ပြီး ဝမ်းဗိုက်ထဲ အဆီစုတာနဲ့ ဆက်စပ်နေတဲ့ ရောင်ရမ်းမှုဖြစ်နှုန်းကို လျော့ကျစေပါတယ်။
အကောင်းဆုံး အစားအသောက် – ပန်းဂေါ်ဖီ
ပန်းဂေါ်ဖီစိမ်း၊ ဂေါ်ဖီထုပ်၊ ပန်းဂေါ်ဖီ၊ ကညွတ်၊ငရုတ်သီး၊ ပဲဝါ စတဲ့ အစားအစာတွေမှာ ဗီတာမင်အေ၊ စီနဲ့ ကေအပြင် ဖောလိတ်၊ ဘီတာကယ်ရိုတင်း၊ မဂ္ဂနီဆီယမ်၊ ကယ်လ်စီယမ်နဲ့ အမျှင်ဓာတ်တွေလည်း ပါဝင်နေပါတယ်။
အဆိုးဆုံး အစားအသောက် – အခွံချွတ်ထားသော ကာဗိုဟိုက်ဒရိတ်
ဂျုံဖြူနဲ့ လုပ်ထားတဲ့ မုန့်တွေနဲ့ ထမင်းဖြူတွေကို မစားပါနဲ့။ ဒီအစာတွေက အစာကြေလွယ်ပြီး သွေးတွင်းသကြားဓာတ်နဲ့ အင်ဆူလင်အဆင့်ကို မြင့်တက်စေလို့ပါ။ အင်ဆူလင်အဆင့်မြင့်တက်တာက ဝမ်းဗိုက်တစ်ဝိုက် အဆီစုပုံမှုကို တိုးစေနိုင်ပါတယ်။
အကောင်းဆုံး အစားအသောက် – အခွံချွတ်မထားသော ကောက်နှံစာ
အခွံချွတ်မထားတဲ့ ကောက်နှံနဲ့ လုပ်ထားတဲ့ ဆန်လုံးညို၊ ပေါင်မုန့်ညိုနဲ့ ပဲနီလေးလို အစာတွေကို စားပါ။ အမေရိကန် အာဟာရ ဆေးပညာဂျာနယ်ရဲ့ လတ်တလော လေ့လာမှုတစ်ရပ်အရ အခွံချွတ်မထားတဲ့ ကောက်နှံစာဟာ ကယ်လိုရီ ထိန်းချုပ်ပေးပြီး ခါးတစ်ဝိုက်ကို အဆီပိုတွေ ကင်းဝေးစေတယ်လို့ သိရပါတယ်။
အဆိုးဆုံး အစားအသောက် – ဆားကဲသော အစားအစာ
ပဲပိစပ်ဆော့ အများအပြားပါတဲ့ ဆူရှီစားပြီးချိန်မှာ လေပွသလို ခံစားနေရပါသလား။ ဆိုဒီယမ်များစွာပါတဲ့ အစားအစာတွေကို စားတာက ရေစုဆောင်းမှု များတာကို ဖြစ်စေနိုင်ပါတယ်။ ဒါကြောင့် ဗိုက်က ဖောင်းလာပြီး လေပွလာတတ်ပါတယ်။ ဗိုက်သား ချပ်ရပ်စေဖို့ တစ်နေ့မှာ ဆိုဒီယမ် ၂၀၀၀ မီလီဂရမ်အောက်ပဲ စားပါ။
အကောင်းဆုံး အစားအသောက် – မပြည့်ဝဆီ
သံလွင်ဆီလိုမျိုး မပြည့်ဝဆီပါတဲ့ အစားအစာတွေဟာ ဗိုက်သားချပ်ရပ်စေတယ်လို့ လေ့လာမှုအသစ်တစ်ရပ်အရ သိရပါတယ်။
အကောင်းဆုံး အစားအသောက် – ရှလကာရည်
ရှလကာရည်မှာပါတဲ့ ချဉ်တဲ့အရသာနဲ့ စူးရှတဲ့ အနံ့ကိုပေးတဲ့ ဓာတ်တွေဟာ ဗိုက်အဆီကို ချေဖျက်ပေးတယ်လို့ ဂျပန်လေ့လာမှု တစ်ရပ်က ဆိုပါတယ်။ အဝလွန်တဲ့ လူတွေဟာ တစ်နေ့မှာ ရှလကာရည် ထမင်းစားဇွန်း တစ်ဇွန်း- နှစ်ဇွန်း စားရာ ၁၂ ပတ်အကြာမှာ ကိုယ်အလေးချိန်၊ ဗိုက်အဆီနဲ့ ခါးအတိုင်းအတာ သိသိသာသာ လျော့ကျမှုရှိတာကို လေ့လာမှုအရ သိရပါတယ်။ ရှလကာရည်မှာပါတဲ့ Acetic Acid ဟာ အဆီချေဖျက်တဲ့ ပရိုတင်းတွေ ထွက်လာအောင် မျိုးရိုးဗီဇကို ပြောင်းလဲပေးတာကြောင့်လို့ လေ့လာသူတွေက ဆိုပါတယ်။
ရေးသားပေးသော ဇွန် နှင့် ကြယ်စင် ကိုကျေးဇူးးတင်ပါတယ်.....
No comments:
Post a Comment